ਫਰੀਦਕੋਟ: ਡਾਕਟਰੀ ਦੀ ਪੜ੍ਹਾਈ ਦਾ ਸੁਪਨਾ ਦੇਖ ਰਹੇ ਵਿਦਿਆਰਥੀਆਂ ਲਈ ਅਹਿਮ ਖ਼ਬਰ ਹੈ। ਬਾਬਾ ਫਰੀਦ ਯੂਨੀਵਰਸਿਟੀ ਆਫ਼ ਹੈਲਥ ਸਾਇੰਸਜ਼ (BFUHS) ਨੇ ਪੰਜਾਬ NEET UG 2026 ਦੇ ਤੀਜੇ ਰਾਊਂਡ ਦੀ ਪ੍ਰੋਵੀਜ਼ਨਲ ਮੈਰਿਟ ਲਿਸਟ ਜਾਰੀ ਕਰ ਦਿੱਤੀ ਹੈ। ਮੈਰਿਟ ਲਿਸਟ ‘ਚ ਨਾਂਅ ਆਉਣ ਵਾਲੇ ਵਿਦਿਆਰਥੀ ਅੱਜ (6 ਅਕਤੂਬਰ) ਤੋਂ ਚੁਆਇਸ ਫਿਲਿੰਗ ਅਤੇ ਲਾਕਿੰਗ ਕਰ ਸਕਣਗੇ।
ਮਹੱਤਵਪੂਰਨ ਤਰੀਕਾਂ
ਯੂਨੀਵਰਸਿਟੀ ਵੱਲੋਂ ਜਾਰੀ ਸੋਧੇ ਹੋਏ ਸ਼ਡਿਊਲ ਅਨੁਸਾਰ ਔਨਲਾਈਨ ਚੁਆਇਸ ਫਿਲਿੰਗ ਅਤੇ ਸਬਮਿਸ਼ਨ 6 ਤੋਂ 7 ਅਕਤੂਬਰ ਤੱਕ ਹੋਵੇਗੀ। 8-9 ਅਕਤੂਬਰ ਨੂੰ ਸੀਟ ਅਲਾਟਮੈਂਟ ਦੀ ਪ੍ਰਕਿਰਿਆ ਚੱਲੇਗੀ ਅਤੇ 10 ਅਕਤੂਬਰ ਨੂੰ ਪ੍ਰੋਵੀਜ਼ਨਲ ਅਲਾਟਮੈਂਟ ਨਤੀਜਾ ਐਲਾਨਿਆ ਜਾਵੇਗਾ। ਨਤੀਜੇ ‘ਤੇ ਇਤਰਾਜ਼ 11 ਅਕਤੂਬਰ ਦੁਪਹਿਰ 3 ਵਜੇ ਤੱਕ ਦਰਜ ਕਰਵਾਏ ਜਾ ਸਕਣਗੇ ਅਤੇ ਉਸੇ ਦਿਨ ਫਾਈਨਲ ਅਲਾਟਮੈਂਟ ਨਤੀਜਾ ਜਾਰੀ ਹੋਵੇਗਾ। ਚੁਣੇ ਗਏ ਵਿਦਿਆਰਥੀਆਂ ਨੂੰ 12 ਤੋਂ 14 ਅਕਤੂਬਰ ਤੱਕ ਬਕਾਇਆ ਫੀਸ ਜਮ੍ਹਾਂ ਕਰਵਾ ਕੇ ਸਬੰਧਤ ਕਾਲਜ ‘ਚ ਰਿਪੋਰਟ ਕਰਨੀ ਹੋਵੇਗੀ।
ਕੌਣ ਹੈ ਯੋਗ?
ਇਹ ਮੈਰਿਟ ਲਿਸਟ ਸਿਰਫ਼ ਉਨ੍ਹਾਂ ਉਮੀਦਵਾਰਾਂ ਦੀ ਹੈ ਜਿਨ੍ਹਾਂ ਨੇ 28 ਸਤੰਬਰ ਤੋਂ 2 ਅਕਤੂਬਰ ਦਰਮਿਆਨ ਨਵੇਂ ਸਿਰੇ ਤੋਂ ਰਜਿਸਟ੍ਰੇਸ਼ਨ ਕਰਵਾਈ ਸੀ। ਲਿਸਟ ‘ਚ NEET UG 2026 ਦੇ ਸਕੋਰ ਦੇ ਆਧਾਰ ‘ਤੇ ਰੈਂਕ ਦਿੱਤੇ ਗਏ ਹਨ ਅਤੇ ਇਹ ਪੰਜਾਬ ਦੇ ਸਰਕਾਰੀ ਤੇ ਪ੍ਰਾਈਵੇਟ ਮੈਡੀਕਲ ਅਤੇ ਡੈਂਟਲ ਕਾਲਜਾਂ ਦੀਆਂ MBBS ਅਤੇ BDS ਸਟੇਟ ਕੋਟਾ ਸੀਟਾਂ ਲਈ ਹੈ। 4 ਅਕਤੂਬਰ ਨੂੰ ਜਾਰੀ ਪ੍ਰੋਵੀਜ਼ਨਲ ਲਿਸਟ ‘ਤੇ ਇਤਰਾਜ਼ 5 ਅਕਤੂਬਰ ਸ਼ਾਮ 4 ਵਜੇ ਤੱਕ ਮੰਗੇ ਗਏ ਸਨ। ਤੀਜੇ ਰਾਊਂਡ ‘ਚ ਉਹ ਉਮੀਦਵਾਰ ਹਿੱਸਾ ਲੈ ਸਕਦੇ ਹਨ ਜਿਨ੍ਹਾਂ ਨੂੰ ਪਹਿਲੇ ਦੋ ਰਾਊਂਡਾਂ ‘ਚ ਕੋਈ ਸੀਟ ਨਹੀਂ ਮਿਲੀ, ਜਿਨ੍ਹਾਂ ਦੀ ਪਹਿਲਾਂ ਦੀ ਅਲਾਟਮੈਂਟ ਰੱਦ ਹੋ ਗਈ, ਜੋ ਅਪਗ੍ਰੇਡ ਚਾਹੁੰਦੇ ਹਨ ਜਾਂ ਜਿਨ੍ਹਾਂ ਨੇ ਸੀਟ ਸਰੈਂਡਰ ਕੀਤੀ ਹੈ।
ਚੁਆਇਸ ਫਿਲਿੰਗ ਕਿਵੇਂ ਕਰੀਏ?
ਵਿਦਿਆਰਥੀਆਂ ਨੂੰ BFUHS ਦੀ ਅਧਿਕਾਰਤ ਵੈੱਬਸਾਈਟ ‘ਤੇ ਜਾ ਕੇ NEET UG 2026 ਕਾਊਂਸਲਿੰਗ ਲਿੰਕ ‘ਤੇ ਕਲਿੱਕ ਕਰਨਾ ਹੋਵੇਗਾ। ਉਮੀਦਵਾਰ ਪੋਰਟਲ ‘ਚ ਆਪਣੇ NEET ਰੋਲ ਨੰਬਰ ਅਤੇ ਪਾਸਵਰਡ ਨਾਲ ਲਾਗਇਨ ਕਰਕੇ ਚੁਆਇਸ ਫਿਲਿੰਗ ਸੈਕਸ਼ਨ ‘ਚ ਆਪਣੀ ਪਸੰਦ ਦੇ ਕਾਲਜ ਅਤੇ ਕੋਰਸ ਚੁਣ ਸਕਣਗੇ। ਪਸੰਦ ਕ੍ਰਮਬੱਧ ਕਰਨ ਤੋਂ ਬਾਅਦ ‘ਸੇਵ’ ਅਤੇ ਫਿਰ ‘ਲਾਕ’ ਕਰਨਾ ਜ਼ਰੂਰੀ ਹੈ, ਨਹੀਂ ਤਾਂ ਚੋਣਾਂ ਸੁਰੱਖਿਅਤ ਨਹੀਂ ਹੋਣਗੀਆਂ।
ਧਿਆਨ ਰੱਖਣ ਵਾਲੀਆਂ ਗੱਲਾਂ
ਧਿਆਨ ਰਹੇ ਕਿ ਤੀਜੇ ਰਾਊਂਡ ‘ਚ ਸੀਟ ਲੈਣ ਤੋਂ ਬਾਅਦ ਸਰੈਂਡਰ, ਅਸਤੀਫ਼ਾ ਜਾਂ ਅਗਲੇ ਰਾਊਂਡ ‘ਚ ਹਿੱਸਾ ਲੈਣ ਦੀ ਇਜਾਜ਼ਤ ਨਹੀਂ ਹੋਵੇਗੀ। ਇਸ ਲਈ ਚੁਆਇਸ ਫਿਲਿੰਗ ਕਰਦੇ ਸਮੇਂ ਕਾਲਜ ਅਤੇ ਕੋਰਸ ਦੀ ਪਸੰਦ ਬਹੁਤ ਸੋਚ-ਸਮਝ ਕੇ ਭਰੋ। ਅਲਾਟਮੈਂਟ ਨਤੀਜਾ ਆਉਣ ‘ਤੇ ਤੁਰੰਤ ਫੀਸ ਅਤੇ ਦਸਤਾਵੇਜ਼ ਤਿਆਰ ਰੱਖੋ ਤਾਂ ਕਿ ਰਿਪੋਰਟਿੰਗ ‘ਚ ਕੋਈ ਦਿੱਕਤ ਨਾ ਆਵੇ।
