ਹਰਿਆਣਾ ਦੇ ਕਿਸਾਨਾਂ ਅਤੇ ਪਸ਼ੂਪਾਲਕਾਂ ਨੇ ਦੁੱਧ ਦੇ ਸਹੀ ਭਾਅ ਦੀ ਮੰਗ ਨੂੰ ਲੈ ਕੇ 1 ਤੋਂ 3 ਅਕਤੂਬਰ ਤੱਕ ਤਿੰਨ ਦਿਨ ਦੁੱਧ ਦੀ ਸਪਲਾਈ ਪੂਰੀ ਤਰ੍ਹਾਂ ਬੰਦ ਰੱਖਣ ਦਾ ਐਲਾਨ ਕੀਤਾ ਹੈ। ਸਿਰਸਾ ਵਿੱਚ ਬੁੱਧਵਾਰ ਸ਼ਾਮ ਹੋਈ ਕਿਸਾਨਾਂ ਤੇ ਪਸ਼ੂਪਾਲਕਾਂ ਦੀ ਬੈਠਕ ਵਿੱਚ ਇਹ ਵੱਡਾ ਫੈਸਲਾ ਲਿਆ ਗਿਆ। ਇਸ ਦੌਰਾਨ ਵੀਟਾ, ਵੇਰਕਾ, ਸਰਸ ਅਤੇ ਅਮੂਲ ਸਮੇਤ ਤਮਾਮ ਡੇਅਰੀ ਕੰਪਨੀਆਂ ਨੂੰ ਪਿੰਡਾਂ ਅਤੇ ਸ਼ਹਿਰਾਂ ਵਿੱਚ ਦੁੱਧ ਦੀਆਂ ਗੱਡੀਆਂ ਨਾ ਭੇਜਣ ਦੀ ਅਪੀਲ ਵੀ ਕੀਤੀ ਗਈ ਹੈ। ਕਿਸਾਨ ਆਗੂਆਂ ਮੁਤਾਬਕ ਇਸ ਹੜਤਾਲ ਦਾ ਅਸਰ ਪੰਜਾਬ ਅਤੇ ਰਾਜਸਥਾਨ ਤੱਕ ਵੀ ਪੈ ਸਕਦਾ ਹੈ।
ਵੀਟਾ ਪਲਾਂਟ ਦਾ ਘੇਰਾਵ ਕਿਉਂ?
ਰਾਸ਼ਟਰੀ ਕਿਸਾਨ ਸੰਗਠਨ, ਹਰਿਆਣਾ ਦੇ ਆਗੂ ਜਸਵੀਰ ਭਾਟੀ ਨੇ ਦੱਸਿਆ ਕਿ ਬੁੱਧਵਾਰ ਸ਼ਾਮ ਦੀ ਬੈਠਕ ਵਿੱਚ ਵੀਰਵਾਰ ਸਵੇਰੇ ਸਿਰਸਾ ਦੇ ਵੀਟਾ ਮਿਲਕ ਪਲਾਂਟ ਦਾ ਘੇਰਾਵ ਕਰਨ ਦਾ ਫੈਸਲਾ ਲਿਆ ਗਿਆ। ਉਨ੍ਹਾਂ ਮੁਤਾਬਕ ਪਲਾਂਟ ਦੇ ਸੀਈਓ ਨੇ ਦੁੱਧ ਦੀ ਸਪਲਾਈ ਜਾਰੀ ਰੱਖਣ ਦੀ ਗੱਲ ਕਹੀ ਸੀ, ਜਿਸ ਤੋਂ ਬਾਅਦ ਕਿਸਾਨਾਂ ਨੇ ਪਲਾਂਟ ਦੇ ਗੇਟ ‘ਤੇ ਧਰਨਾ ਦੇ ਕੇ ਦੁੱਧ ਦੀ ਸਪਲਾਈ ਰੋਕਣ ਦਾ ਫੈਸਲਾ ਕੀਤਾ।
ਕੀ ਹਨ ਕਿਸਾਨਾਂ ਦੀਆਂ ਮੁੱਖ ਮੰਗਾਂ
ਕਿਸਾਨਾਂ ਅਤੇ ਪਸ਼ੂਪਾਲਕਾਂ ਦੀ ਮੁੱਖ ਮੰਗ ਹੈ ਕਿ ਗਾਂ ਦੇ ਦੁੱਧ ਦਾ ਭਾਅ 80 ਰੁਪਏ ਅਤੇ ਮੱਝ ਦੇ ਦੁੱਧ ਦਾ ਭਾਅ 100 ਰੁਪਏ ਪ੍ਰਤੀ ਲੀਟਰ ਕੀਤਾ ਜਾਵੇ। ਕਿਸਾਨ ਆਗੂਆਂ ਦਾ ਕਹਿਣਾ ਹੈ ਕਿ 50 ਸਾਲਾਂ ਵਿੱਚ ਪਹਿਲੀ ਵਾਰ ਦੁੱਧ ਦੇ ਭਾਅ ਵਧਾਉਣ ਦੀ ਮੰਗ ਕੀਤੀ ਜਾ ਰਹੀ ਹੈ। ਉਨ੍ਹਾਂ ਦਾ ਤਰਕ ਹੈ ਕਿ ਪਿਛਲੇ ਕੁਝ ਸਮੇਂ ਵਿੱਚ ਖਲ, ਬਿਨੌਲਾ, ਤੂੜੀ ਅਤੇ ਹਰੇ ਚਾਰੇ ਦੇ ਭਾਅ ਕਈ ਗੁਣਾ ਵਧ ਚੁੱਕੇ ਹਨ, ਜਦੋਂਕਿ ਦੁੱਧ ਦਾ ਭਾਅ ਲਾਗਤ ਦੇ ਮੁਕਾਬਲੇ ਬਹੁਤ ਘੱਟ ਮਿਲ ਰਿਹਾ ਹੈ। ਬਾਜ਼ਾਰ ਵਿੱਚ ਨਕਲੀ ਦੁੱਧ ਦੇ ਵੱਧਦੇ ਕਾਰੋਬਾਰ ‘ਤੇ ਰੋਕ ਲਗਾਉਣਾ ਵੀ ਇਸ ਅੰਦੋਲਨ ਦਾ ਮਕਸਦ ਹੈ।
ਦੁੱਧ ਵੇਚਣ ‘ਤੇ 51 ਹਜ਼ਾਰ ਰੁਪਏ ਜੁਰਮਾਨਾ
ਹੜਤਾਲ ਨੂੰ ਸਖ਼ਤੀ ਨਾਲ ਲਾਗੂ ਕਰਨ ਲਈ ਕਿਸਾਨ ਜਥੇਬੰਦੀਆਂ ਨੇ ਸਖ਼ਤ ਨਿਯਮ ਵੀ ਬਣਾਏ ਹਨ। ਫੈਸਲੇ ਮੁਤਾਬਕ 1 ਤੋਂ 3 ਅਕਤੂਬਰ ਦੌਰਾਨ ਜੇ ਕੋਈ ਦੁੱਧ ਵੇਚਦਾ ਫੜਿਆ ਗਿਆ ਤਾਂ ਉਸ ‘ਤੇ 51,000 ਰੁਪਏ ਦਾ ਜੁਰਮਾਨਾ ਲਗਾਇਆ ਜਾਵੇਗਾ ਅਤੇ ਦੁੱਧ ਢੋਣ ਵਾਲੇ ਵਾਹਨ ਜ਼ਬਤ ਕੀਤੇ ਜਾਣਗੇ। ਪਿੰਡ-ਪਿੰਡ ਵਿੱਚ ਕਮੇਟੀਆਂ ਗਠਿਤ ਕੀਤੀਆਂ ਗਈਆਂ ਹਨ ਅਤੇ ਮੁਨਾਦੀ ਕਰਵਾ ਕੇ ਪਸ਼ੂਪਾਲਕਾਂ ਨੂੰ ਤਿੰਨ ਦਿਨ ਦੁੱਧ ਨਾ ਖਰੀਦਣ ਅਤੇ ਨਾ ਵੇਚਣ ਦੀ ਅਪੀਲ ਕੀਤੀ ਗਈ ਹੈ।
ਆਮ ਲੋਕਾਂ ‘ਤੇ ਪੈ ਸਕਦਾ ਹੈ ਅਸਰ
ਕਿਸਾਨ ਆਗੂਆਂ ਨੇ ਦੱਸਿਆ ਕਿ ਇਸ ਅੰਦੋਲਨ ਨੂੰ ਪੰਜਾਬ ਅਤੇ ਰਾਜਸਥਾਨ ਦੇ ਕਿਸਾਨਾਂ ਅਤੇ ਪਸ਼ੂਪਾਲਕਾਂ ਦਾ ਵੀ ਸਮਰਥਨ ਮਿਲਿਆ ਹੈ, ਹਾਲਾਂਕਿ ਹਿਸਾਰ ਦੇ ਕਿਸਾਨਾਂ ਨੇ ਇਸ ਹੜਤਾਲ ਵਿੱਚ ਸ਼ਾਮਲ ਨਾ ਹੋਣ ਦੀ ਗੱਲ ਕਹੀ ਹੈ। ਦੂਜੇ ਪਾਸੇ, ਤਿੰਨ ਦਿਨ ਦੁੱਧ ਦੀ ਕਮੀ ਨਾਲ ਬਾਜ਼ਾਰਾਂ ਵਿੱਚ ਹਾਹਾਕਾਰ ਨਾ ਮਚੇ, ਇਸ ਲਈ ਸਰਕਾਰੀ ਡੇਅਰੀ ਬ੍ਰਾਂਡ ਵੀਟਾ ਅਤੇ ਪ੍ਰਸ਼ਾਸਨ ਨੇ ਪਾਊਡਰ ਮਿਲਕ ਅਤੇ ਵਿਕਲਪਕ ਸਟੋਰੇਜ ਦੀਆਂ ਤਿਆਰੀਆਂ ਪਹਿਲਾਂ ਹੀ ਸ਼ੁਰੂ ਕਰ ਦਿੱਤੀਆਂ ਹਨ, ਤਾਂ ਜੋ ਖਪਤਕਾਰਾਂ ਨੂੰ ਜ਼ਰੂਰੀ ਸਪਲਾਈ ਅੰਸ਼ਕ ਤੌਰ ‘ਤੇ ਯਕੀਨੀ ਕੀਤੀ ਜਾ ਸਕੇ। ਕੁਝ ਜ਼ਿਲ੍ਹਿਆਂ ਵਿੱਚ ਦੁੱਧ ਦੀ ਸਪਲਾਈ ਸਾਧਾਰਨ ਰਹਿਣ ਦੀ ਖ਼ਬਰ ਵੀ ਸਾਹਮਣੇ ਆਈ ਹੈ।
