ਕਾਂਗਰਸੀ ਵਿਧਾਇਕ ਸੁਖਪਾਲ ਸਿੰਘ ਖਹਿਰਾ LIVE ਆ ਕੇ ਲੁਧਿਆਣਾ ਦੇ ਸੜਕ ਧੋਣ ਪ੍ਰੋਜੈਕਟ ਨੂੰ ਲੈ ਕੇ ਆਮ ਆਦਮੀ ਪਾਰਟੀ ਦੇ ਪੰਜਾਬ ਇੰਚਾਰਜ ਮਨੀਸ਼ ਸਿਸੋਦੀਆ ‘ਤੇ ਸਿੱਧਾ ਹਮਲਾ ਬੋਲਿਆ ਹੈ। ਖਹਿਰਾ ਨੇ ਸਵਾਲ ਕੀਤਾ ਕਿ ਜਦੋਂ ਨਗਰ ਨਿਗਮ ਕੋਲ ਪਹਿਲਾਂ ਹੀ 9 ਮਕੈਨੀਕਲ ਸਵੀਪਿੰਗ ਮਸ਼ੀਨਾਂ ਹਨ, ਤਾਂ 82 ਕਰੋੜ ਰੁਪਏ ਦੇ ਰੋਡ ਵਾਸ਼ਿੰਗ ਪ੍ਰੋਜੈਕਟ ਲਈ ਜ਼ੋਰ ਕਿਉਂ ਲਾਇਆ ਜਾ ਰਿਹਾ ਹੈ।
ਖਹਿਰਾ ਨੇ ਕੀ ਦੋਸ਼ ਲਾਏ?
ਲਾਈਵ ਦੌਰਾਨ ਖਹਿਰਾ ਨੇ ਕਿਹਾ ਕਿ ਇਹ ਪ੍ਰੋਜੈਕਟ ਲੁਧਿਆਣਾ ਦੀਆਂ ਸੜਕਾਂ ਨੂੰ ਤਬਾਹ ਕਰ ਦੇਵੇਗਾ। ਉਨ੍ਹਾਂ ਮੁਤਾਬਕ ਮਾਹਿਰਾਂ ਦੀ ਚੇਤਾਵਨੀ ਦੇ ਬਾਵਜੂਦ ਪ੍ਰੋਜੈਕਟ ਨੂੰ ਅੱਗੇ ਵਧਾਇਆ ਜਾ ਰਿਹਾ ਹੈ। ਖਹਿਰਾ ਨੇ ਇਸਨੂੰ ‘AAP ਦੇ ਦਿੱਲੀ ਆਕਾਵਾਂ ਵੱਲੋਂ ਪੰਜਾਬ ਦੀ ਇੱਕ ਹੋਰ ਲੁੱਟ’ ਦੱਸਿਆ ਅਤੇ ਮੰਗ ਕੀਤੀ ਕਿ ਜਦੋਂ ਨਿਗਮ ਕੋਲ ਮਸ਼ੀਨਰੀ ਪਹਿਲਾਂ ਹੀ ਮੌਜੂਦ ਹੈ, ਤਾਂ ਕਰੋੜਾਂ ਰੁਪਏ ਦੇ ਨਵੇਂ ਠੇਕੇ ਦੀ ਲੋੜ ਕਿਸ ਗੱਲ ਦੀ।
ਕਿਸ ਪ੍ਰੋਜੈਕਟ ‘ਤੇ ਗੱਲ ਹੋ ਰਹੀ ਹੈ?
ਲੁਧਿਆਣਾ ਨਗਰ ਨਿਗਮ ਦਾ ₹81.54 ਕਰੋੜ ਦਾ ਮਕੈਨੀਕਲ ਸਵੀਪਿੰਗ ਅਤੇ ਸੜਕ ਧੋਣ ਪ੍ਰਸਤਾਵ ਹਾਲ ਹੀ ਵਿੱਚ F&CC ਤੋਂ ਮਨਜ਼ੂਰ ਹੋਇਆ ਹੈ ਅਤੇ ਹੁਣ ਹਾਊਸ ਮੀਟਿੰਗ ਦੇ ਸਾਹਮਣੇ ਹੈ। ਥਾਪਰ ਇੰਸਟੀਚਿਊਟ ਦੇ ਮਾਹਿਰ ਡਾ. ਤਨੁਜ ਚੋਪੜਾ ਨੇ ਨਿਗਮ ਨੂੰ ਲਿਖਤੀ ਰਾਏ ਵਿੱਚ ਚੇਤਾਵਨੀ ਦਿੱਤੀ ਸੀ ਕਿ ਬਿਟੂਮਿਨ ਸੜਕਾਂ ‘ਤੇ ਹਾਈ-ਪ੍ਰੈਸ਼ਰ ਧੋਣ ਨਾਲ ਸਤਹ ਖ਼ਰਾਬ ਹੁੰਦੀ ਹੈ ਅਤੇ ਪਾਣੀ ਵੜਨ ਨਾਲ ਸੜਕਾਂ ਕਮਜ਼ੋਰ ਹੁੰਦੀਆਂ ਹਨ — ਨਿਯਮਤ ਸਫ਼ਾਈ ਲਈ ਮਕੈਨੀਕਲ ਬਰੂਮ ਜਾਂ ਵੈਕਿਊਮ ਸਵੀਪਿੰਗ ਨੂੰ ਤਰਜੀਹ ਦਿੱਤੀ ਜਾਵੇ। ਕੌਂਸਲਰ ਗੌਰਵ ਭੱਟੀ ਪਹਿਲਾਂ ਹੀ ਇਸਦਾ ਵਿਰੋਧ ਕਰਦੇ ਹੋਏ ਮੇਅਰ ਦੀ ਰਿਹਾਇਸ਼ ਸਾਹਮਣੇ ਧਰਨਾ ਦੇ ਚੁੱਕੇ ਹਨ।
ਸਿਸੋਦੀਆ ‘ਤੇ ਖਹਿਰਾ ਦੇ ਪਹਿਲੇ ਦੋਸ਼
ਖਹਿਰਾ ਪਿਛਲੇ ਕੁਝ ਹਫ਼ਤਿਆਂ ਤੋਂ ਲਗਾਤਾਰ ਮਨੀਸ਼ ਸਿਸੋਦੀਆ ਨੂੰ ਨਿਸ਼ਾਨੇ ‘ਤੇ ਰੱਖ ਰਹੇ ਹਨ। ਹਾਲ ਹੀ ਵਿੱਚ ਉਨ੍ਹਾਂ ਨੇ ਚੰਡੀਗੜ੍ਹ ਦੇ ਸੈਕਟਰ 39 ਵਿੱਚ ਪੰਜਾਬ ਸਰਕਾਰ ਦੀ ਕੋਠੀ ਵਿੱਚ ਸਿਸੋਦੀਆ ਦੇ ਰਹਿਣ ਦਾ ਦੋਸ਼ ਲਾਇਆ ਸੀ, ਜਿਸ ‘ਤੇ ਸਿਆਸੀ ਵਿਵਾਦ ਭਖਿਆ ਸੀ। ਹੁਣ ਰੋਡ ਵਾਸ਼ਿੰਗ ਪ੍ਰੋਜੈਕਟ ਨੂੰ ਲੈ ਕੇ ਖਹਿਰਾ ਨੇ ਫਿਰ ਸਿਸੋਦੀਆ ਦਾ ਨਾਂ ਮੂਹਰੇ ਕਰ ਦਿੱਤਾ ਹੈ।
