ਚੰਡੀਗੜ੍ਹ ਦੇ ਸਰਕਾਰੀ ਸਕੂਲਾਂ ਨੇ ਦੇਸ਼ ਭਰ ਵਿੱਚ ਧਮਾਲ ਮਚਾ ਦਿੱਤੀ ਹੈ। EducationWorld India School Rankings 2026-27 ਵਿੱਚ ਸੈਕਟਰ-16ਡੀ ਦਾ ਗਵਰਨਮੈਂਟ ਮਾਡਲ ਸੀਨੀਅਰ ਸੈਕੰਡਰੀ ਸਕੂਲ ਸਟੇਟ ਗਵਰਨਮੈਂਟ ਡੇ ਸਕੂਲ ਕੈਟਾਗਰੀ ਵਿੱਚ ਪੂਰੇ ਦੇਸ਼ ਵਿੱਚ ਪਹਿਲੇ ਨੰਬਰ ‘ਤੇ ਰਿਹਾ ਹੈ। ਚੰਡੀਗੜ੍ਹ ਦੇ ਕੁੱਲ ਤਿੰਨ ਸਰਕਾਰੀ ਸਕੂਲਾਂ ਨੇ ਦੇਸ਼ ਦੇ ਟਾਪ-10 ਵਿੱਚ ਥਾਂ ਬਣਾਈ ਹੈ।
ਟਾਪ-10 ਵਿੱਚ ਕਿਹੜੇ-ਕਿਹੜੇ ਸਕੂਲ
ਰੈਂਕਿੰਗ ਵਿੱਚ ਸੈਕਟਰ-16ਡੀ ਸਕੂਲ ਨੇ 1082 ਅੰਕਾਂ ਨਾਲ ਪਹਿਲਾ ਸਥਾਨ ਹਾਸਲ ਕੀਤਾ ਹੈ। ਇਸ ਤੋਂ ਬਾਅਦ ਗਵਰਨਮੈਂਟ ਮਾਡਲ ਸੀਨੀਅਰ ਸੈਕੰਡਰੀ ਸਕੂਲ, ਮਨੀਮਾਜਰਾ 1026 ਅੰਕਾਂ ਨਾਲ ਨੌਵੇਂ ਅਤੇ ਗਵਰਨਮੈਂਟ ਮਾਡਲ ਸੀਨੀਅਰ ਸੈਕੰਡਰੀ ਸਕੂਲ, ਸੈਕਟਰ-35ਡੀ 1023 ਅੰਕਾਂ ਨਾਲ ਦਸਵੇਂ ਸਥਾਨ ‘ਤੇ ਰਿਹਾ ਹੈ। ਦਿੱਲੀ ਦੇ ਚਾਰ ਸਰਕਾਰੀ ਸਕੂਲ ਵੀ ਟਾਪ-10 ਵਿੱਚ ਸ਼ਾਮਲ ਹਨ, ਜਿਨ੍ਹਾਂ ਵਿੱਚੋਂ ਚਾਰੋਂ ਡਾ. ਭੀਮ ਰਾਓ ਅੰਬੇਡਕਰ (DBRA) CM ਸ਼੍ਰੀ ਸਕੂਲ ਹਨ।
ਦੂਜੇ ਨੰਬਰ ‘ਤੇ ਕੋਜ਼ੀਕੋਡ (ਕੇਰਲਾ) ਦਾ GVHSS for Girls ਸਕੂਲ, ਚੌਥੇ ‘ਤੇ ਓਡੀਸ਼ਾ ਆਦਰਸ਼ ਵਿਦਿਆਲਿਆ, ਅੱਠਵੇਂ ‘ਤੇ ਭੋਪਾਲ ਦਾ ਮਾਡਲ ਹਾਇਰ ਸੈਕੰਡਰੀ ਸਕੂਲ ਅਤੇ ਨੌਵੇਂ ‘ਤੇ ਮੁੰਬਈ ਦਾ ਵਰਲੀ ਸੀਫੇਸ ਪਬਲਿਕ ਸਕੂਲ ਰਿਹਾ ਹੈ।
ਕਿੰਨੇ ਮਾਪਦੰਡਾਂ ‘ਤੇ ਹੋਇਆ ਮੁਲਾਂਕਣ
ਰੈਂਕਿੰਗ ਵਿੱਚ ਸਕੂਲਾਂ ਦਾ ਮੁਲਾਂਕਣ 14 ਮਾਪਦੰਡਾਂ ‘ਤੇ ਕੀਤਾ ਗਿਆ, ਜਿਨ੍ਹਾਂ ਵਿੱਚ ਅਕਾਦਮਿਕ ਸਾਖ, ਅਧਿਆਪਕਾਂ ਦੀ ਯੋਗਤਾ, ਵਿਦਿਆਰਥੀਆਂ ‘ਤੇ ਵਿਅਕਤੀਗਤ ਧਿਆਨ, ਪਾਠਕ੍ਰਮ ਅਤੇ ਅਧਿਆਪਨ ਵਿਧੀ, ਸਹਿ-ਪਾਠਕ੍ਰਮ ਗਤੀਵਿਧੀਆਂ, ਖੇਡਾਂ, ਸਕੂਲ ਦੀ ਅਗਵਾਈ, ਬੁਨਿਆਦੀ ਢਾਂਚਾ, ਵਿਦਿਆਰਥੀ ਭਲਾਈ, ਮਾਪਿਆਂ ਦੀ ਸ਼ਮੂਲੀਅਤ ਅਤੇ ਸਮਾਜਕ ਸੇਵਾ ਸ਼ਾਮਲ ਹਨ।
ਸਰਵੇ ਵਿੱਚ 22 ਰਾਜਾਂ ਦੇ 34 ਸ਼ਹਿਰਾਂ ਦੇ 18,000 ਤੋਂ ਵੱਧ ਉੱਤਰਦਾਤਾਵਾਂ — ਮਾਪਿਆਂ, ਅਧਿਆਪਕਾਂ, ਸਿੱਖਿਆ ਮਾਹਿਰਾਂ ਅਤੇ ਕਾਊਂਸਲਰਾਂ — ਦੀ ਰਾਏ ਲਈ ਗਈ। ਪ੍ਰਭਾਵਿਤ ਨਤੀਜਿਆਂ ਤੋਂ ਬਚਣ ਲਈ ਹਰੇਕ ਉੱਤਰਦਾਤਾ ਦਾ ਸਿਰਫ਼ ਇੱਕ ਹੀ ਜਵਾਬ ਮੰਨਿਆ ਗਿਆ ਅਤੇ ਸ਼ੱਕੀ ਜਵਾਬ ਰੱਦ ਕਰ ਦਿੱਤੇ ਗਏ।
ਸਰਕਾਰੀ ਸਕੂਲਾਂ ਲਈ ਵੱਡਾ ਮਾਣ
EducationWorld 1999 ਵਿੱਚ ਸਥਾਪਤ ਭਾਰਤ ਦਾ ਪ੍ਰਮੁੱਖ ਸਿੱਖਿਆ ਮੈਗਜ਼ੀਨ ਹੈ, ਜਿਸ ਦੇ ਪਾਠਕਾਂ ਦੀ ਗਿਣਤੀ 10 ਲੱਖ ਤੋਂ ਵੱਧ ਹੈ। ਸਰਕਾਰੀ ਸਕੂਲਾਂ ਦਾ ਦੇਸ਼ ਦੇ ਟਾਪ-10 ਵਿੱਚ ਆਉਣਾ ਇਹ ਸਾਬਤ ਕਰਦਾ ਹੈ ਕਿ ਸਰਕਾਰੀ ਸਿੱਖਿਆ ਵੀ ਗੁਣਵੱਤਾ ਵਿੱਚ ਪ੍ਰਾਈਵੇਟ ਸਕੂਲਾਂ ਨੂੰ ਟੱਕਰ ਦੇ ਰਹੀ ਹੈ।
ਚੰਡੀਗੜ੍ਹ ਲਈ ਦੋਹਰੀ ਖੁਸ਼ੀ ਇਹ ਵੀ ਹੈ ਕਿ ਪ੍ਰਾਈਵੇਟ ਸਕੂਲ ਕੈਟਾਗਰੀਆਂ ਵਿੱਚ ਸੇਕ੍ਰੇਡ ਹਾਰਟ ਸੀਨੀਅਰ ਸੈਕੰਡਰੀ ਸਕੂਲ, ਚੰਡੀਗੜ੍ਹ ਗਰਲਜ਼ ਡੇ ਸਕੂਲ ਵਿੱਚ ਅਤੇ ਸੇਂਟ ਜਾਨਜ਼ ਹਾਈ ਸਕੂਲ, ਚੰਡੀਗੜ੍ਹ ਬੌਏਜ਼ ਡੇ ਸਕੂਲ ਵਿੱਚ ਦੇਸ਼ ਵਿੱਚ ਪਹਿਲੇ ਨੰਬਰ ‘ਤੇ ਰਿਹਾ ਹੈ।
