ਮੰਤਰੀਆਂ ਦੀਆਂ ਕੋਠੀਆਂ ‘ਤੇ ‘ਕਬਜ਼ਾ’! ਖਹਿਰਾ ਨੇ ਰਾਜਪਾਲ ਨੂੰ ਲਿਖਿਆ ਪੱਤਰ, ਸਿਸੋਦੀਆ ਦਾ ਨਾਂ ਮੂਹਰੇ

ਚੰਡੀਗੜ੍ਹ। ਕਾਂਗਰਸ ਵਿਧਾਇਕ ਸੁਖਪਾਲ ਸਿੰਘ ਖਹਿਰਾ ਨੇ ਪੰਜਾਬ ਦੇ ਰਾਜਪਾਲ ਗੁਲਾਬ ਚੰਦ ਕਟਾਰੀਆ ਨੂੰ ਚਿੱਠੀ ਲਿਖ ਕੇ ਆਮ ਆਦਮੀ ਪਾਰਟੀ ਦੇ ਆਗੂਆਂ ਵੱਲੋਂ ਸਰਕਾਰੀ ਮੰਤਰੀਆਂ ਦੇ ਨਿਵਾਸਾਂ ‘ਤੇ ਕਥਿਤ ਗ਼ੈਰ-ਕਾਨੂੰਨੀ ਕਬਜ਼ੇ ਦੀ ਜਾਂਚ ਦੀ ਮੰਗ ਕੀਤੀ ਹੈ। ਖਹਿਰਾ ਦਾ ਦੋਸ਼ ਹੈ ਕਿ ਦਿੱਲੀ ਦੇ ਸਾਬਕਾ ਉਪ ਮੁੱਖ ਮੰਤਰੀ ਮਨੀਸ਼ ਸਿਸੋਦੀਆ ਸਮੇਤ ‘ਆਪ’ ਦੇ ਕਈ ਆਗੂ ਚੰਡੀਗੜ੍ਹ ਵਿੱਚ ਪੰਜਾਬ ਦੇ ਮੰਤਰੀਆਂ ਦੀਆਂ ਕੋਠੀਆਂ ਵਿੱਚ ਰਹਿ ਰਹੇ ਹਨ, ਹਾਲਾਂਕਿ ਉਨ੍ਹਾਂ ਨੂੰ ਇਸ ਦਾ ਕੋਈ ਸਰਕਾਰੀ ਹੱਕ ਨਹੀਂ।

ਸਿਸੋਦੀਆ ਅਤੇ ਬਿਸ਼ਨੋਈ ‘ਤੇ ਗੰਭੀਰ ਦੋਸ਼

ਖਹਿਰਾ ਨੇ ਆਪਣੇ ਪੱਤਰ ਵਿੱਚ ਦਾਅਵਾ ਕੀਤਾ ਹੈ ਕਿ ਮਨੀਸ਼ ਸਿਸੋਦੀਆ ਚੰਡੀਗੜ੍ਹ ਦੇ ਸੈਕਟਰ 39 ਵਿੱਚ ਸਥਿਤ ਕੋਠੀ ਨੰਬਰ 960 ਵਿੱਚ ਰਹਿ ਰਹੇ ਹਨ, ਜੋ ਅਸਲ ਵਿੱਚ ਪੰਜਾਬ ਦੇ ਜੇਲ੍ਹ ਮੰਤਰੀ ਡਾ. ਰਵਜੋਤ ਸਿੰਘ ਨੂੰ ਅਲਾਟ ਸੀ। ਇਸੇ ਤਰ੍ਹਾਂ ‘ਆਪ’ ਦੀ ਪੰਜਾਬ ਇੰਚਾਰਜ ਗਾਇਤਰੀ ਬਿਸ਼ਨੋਈ ਕੋਠੀ ਨੰਬਰ 961 ਵਿੱਚ ਰਹਿ ਰਹੀ ਹੈ, ਜੋ ਪੰਜਾਬ ਦੇ ਸਿਹਤ ਮੰਤਰੀ ਡਾ. ਬਲਬੀਰ ਸਿੰਘ ਦੇ ਨਾਂ ‘ਤੇ ਅਲਾਟ ਹੈ।

ਖਹਿਰਾ ਨੇ ਆਪਣੇ ਪੱਤਰ ਵਿੱਚ ਲਿਖਿਆ ਹੈ ਕਿ ਬਿਸ਼ਨੋਈ ਨੇ ਖ਼ੁਦ ਫੇਸਬੁੱਕ ‘ਤੇ ਵੀਡੀਓ ਪਾ ਕੇ ਮੰਨਿਆ ਸੀ ਕਿ ਉਹ ਕੋਠੀ ਨੰਬਰ 961 ਵਿੱਚ ਰਹਿ ਰਹੀ ਹੈ। ਉਨ੍ਹਾਂ ਮੁਤਾਬਕ ਇਸ ਨਾਲ ਗ਼ੈਰ-ਕਾਨੂੰਨੀ ਕਬਜ਼ੇ ਦਾ ਤੱਥ ਸਾਬਤ ਹੁੰਦਾ ਹੈ।

ਹੋਰ ਕੋਠੀਆਂ ਦੀ ਸੂਚੀ ਵੀ ਜਨਤਕ

ਖਹਿਰਾ ਨੇ ਸੈਕਟਰ 39 ਵਿੱਚ ਹੋਰ ਸਰਕਾਰੀ ਕੋਠੀਆਂ ਦੀ ਸੂਚੀ ਵੀ ਦਿੱਤੀ ਹੈ, ਜਿਨ੍ਹਾਂ ‘ਤੇ ਉਨ੍ਹਾਂ ਮੁਤਾਬਕ ਅਣਅਧਿਕਾਰਤ ਕਬਜ਼ਾ ਹੈ। ਇਸ ਵਿੱਚ ਕੋਠੀ ਨੰਬਰ 902 (ਦੀਪਕ ਚੌਹਾਨ), 905 (ਕਮਲ ਬਾਂਸਲ), 919 (ਅਨੁਰਾਗ ਕੁੰਡੂ), 926 (ਸਤਿੰਦਰ ਜੈਨ), 927 (ਆਦਿਲ ਅਹਿਮਦ ਖਾਨ), 928 (ਸ਼ਾਂਟੀ), 921 (ਜਰਨੈਲ ਸਿੰਘ), 964 (ਸਿਸੋਦੀਆ ਦੀ ਟੀਮ) ਅਤੇ 965 (ਆਦਿਲ ਅਹਿਮਦ ਖਾਨ ਦੀ ਟੀਮ) ਸ਼ਾਮਲ ਹਨ। ਖਹਿਰਾ ਨੇ ਇਹ ਵੀ ਦੋਸ਼ ਲਗਾਇਆ ਕਿ ਸੈਕਟਰ 39 ਦੇ ਸਰਕਟ ਹਾਊਸ ਵਿੱਚ 18 ਕਮਰੇ ਵੀ ਬੁੱਕ ਕਰਵਾਏ ਗਏ ਹਨ।

ਰਾਜਪਾਲ ਤੋਂ ਕਈ ਮੰਗਾਂ

ਖਹਿਰਾ ਨੇ ਰਾਜਪਾਲ ਤੋਂ ਸਮਾਂ-ਬੱਧ ਸੁਤੰਤਰ ਜਾਂਚ ਦੀ ਮੰਗ ਕਰਦਿਆਂ ਹਰ ਨਿਵਾਸ ਦੇ ਮੂਲ ਅਲਾਟਮੈਂਟ ਆਦੇਸ਼, ਅਲਾਟੀ ਦਾ ਨਾਂ ਅਤੇ ਅਹੁਦਾ, ਅਲਾਟਮੈਂਟ ਦੀ ਮਿਤੀ, ਰਿਹਾਇਸ਼ ਦੀ ਮਿਆਦ ਅਤੇ ਮੌਜੂਦਾ ਕਬਜ਼ੇ ਦੇ ਵੇਰਵੇ ਮੰਗੇ ਹਨ। ਉਨ੍ਹਾਂ ਨੇ ਕਿਰਾਇਆ, ਬਿਜਲੀ-ਪਾਣੀ ਅਤੇ ਹੋਰ ਸਰਕਾਰੀ ਬਕਾਇਆਂ ਦੀ ਵਸੂਲੀ ਦੀ ਵੀ ਮੰਗ ਕੀਤੀ ਹੈ।

ਖਹਿਰਾ ਨੇ ਕਿਹਾ ਕਿ ਜਿੱਥੇ ਵੀ ਕਬਜ਼ਾ ਅਣਅਧਿਕਾਰਤ ਜਾਂ ਮਿਆਦ/ਸ਼ਰਤਾਂ ਤੋਂ ਬਾਹਰ ਮਿਲੇ, ਉੱਥੋਂ ਕਾਨੂੰਨ ਮੁਤਾਬਕ ਕਬਜ਼ਾ ਹਟਾਇਆ ਜਾਵੇ ਅਤੇ ਬਕਾਇਆ ਰਕਮ ਵਸੂਲੀ ਜਾਵੇ। ਉਨ੍ਹਾਂ ਨੇ ਇਹ ਵੀ ਮੰਗ ਕੀਤੀ ਕਿ ਜਾਂਚ ਦੇ ਨਤੀਜੇ ਜਨਤਕ ਕੀਤੇ ਜਾਣ, ਤਾਂ ਜੋ ਜਨਤਕ ਸੰਪਤੀ ਦੀ ਵਰਤੋਂ ਵਿੱਚ ਪਾਰਦਰਸ਼ਤਾ ਬਣੀ ਰਹੇ। ਖਹਿਰਾ ਨੇ ਕਿਹਾ, “ਸਰਕਾਰੀ ਨਿਵਾਸ ਕੀਮਤੀ ਜਨਤਕ ਸੰਪਤੀ ਹਨ ਅਤੇ ਜਨਤਾ ਦੇ ਪੈਸੇ ਨਾਲ ਚੱਲਦੇ ਹਨ। ਇਨ੍ਹਾਂ ਦਾ ਕਬਜ਼ਾ ਪਾਰਦਰਸ਼ੀ ਨਿਯਮਾਂ ਅਤੇ ਵਾਜਬ ਆਦੇਸ਼ਾਂ ‘ਤੇ ਆਧਾਰਿਤ ਹੋਣਾ ਚਾਹੀਦਾ ਹੈ।”

ਗੌਰਤਲਬ ਹੈ ਕਿ ਖਹਿਰਾ ਭੁਲੱਥ ਤੋਂ ਵਿਧਾਇਕ ਅਤੇ ਕਿਸਾਨ ਕਾਂਗਰਸ ਦੇ ਅਖਿਲ ਭਾਰਤੀ ਚੇਅਰਮੈਨ ਹਨ ਅਤੇ ਪਹਿਲਾਂ ਪੰਜਾਬ ਵਿੱਚ ਵਿਰੋਧੀ ਧਿਰ ਦੇ ਨੇਤਾ ਵੀ ਰਹਿ ਚੁੱਕੇ ਹਨ। ਉਨ੍ਹਾਂ ਨੇ ਰਾਜਪਾਲ ਤੋਂ ਬੇਨਤੀ ਕੀਤੀ ਹੈ ਕਿ ਸਿਆਸੀ ਪੱਖਪਾਤ ਤੋਂ ਉੱਪਰ ਉੱਠ ਕੇ ਇਹ ਯਕੀਨੀ ਬਣਾਇਆ ਜਾਵੇ ਕਿ ਕੋਈ ਵੀ ਵਿਅਕਤੀ ਬਿਨਾਂ ਕਾਨੂੰਨੀ ਹੱਕ ਦੇ ਸਰਕਾਰੀ ਰਿਹਾਇਸ਼ ‘ਤੇ ਕਬਜ਼ਾ ਨਾ ਰੱਖ ਸਕੇ।