IPL 2027 ਤੋਂ ਪਹਿਲਾਂ ਪੰਜਾਬ ਕਿੰਗਜ਼ ਨੂੰ ਵੱਡਾ ਝਟਕਾ ਲੱਗਾ ਹੈ। ਮੁੱਖ ਕੋਚ ਰਿੱਕੀ ਪੌਂਟਿੰਗ ਦੇ ਸਹਿਯੋਗੀ ਸਟਾਫ਼ ਦੇ ਦੋ ਅਹਿਮ ਮੈਂਬਰਾਂ — ਜੇਮਜ਼ ਹੋਪਸ ਅਤੇ ਬ੍ਰੈਡ ਹੈਡਿਨ — ਨੇ ਫਰੈਂਚਾਈਜ਼ੀ ਤੋਂ ਅਸਤੀਫ਼ਾ ਦੇ ਦਿੱਤਾ ਹੈ। ਦੋਵੇਂ ਕੋਚ ਹੁਣ ਆਸਟ੍ਰੇਲੀਆ ਦੀ ਬਿਗ ਬੈਸ਼ ਲੀਗ (BBL) ‘ਚ ਨਵੀਆਂ ਭੂਮਿਕਾਵਾਂ ਸੰਭਾਲਣਗੇ।
ਕੌਣ-ਕੌਣ ਗਿਆ?
ਜੇਮਜ਼ ਹੋਪਸ ਟੀਮ ਦੇ ਤੇਜ਼ ਗੇਂਦਬਾਜ਼ੀ ਕੋਚ ਸਨ। ਆਸਟ੍ਰੇਲੀਆ ਦੇ ਸਾਬਕਾ ਆਲਰਾਊਂਡਰ ਹੋਪਸ ਨੇ ਆਪਣੇ ਦੇਸ਼ ਲਈ 84 ਵਨਡੇ ਤੇ 12 ਟੀ-20 ਮੈਚ ਖੇਡੇ ਹਨ। ਉਹ ਪੌਂਟਿੰਗ ਨਾਲ ਦਿੱਲੀ ਕੈਪੀਟਲਜ਼ ‘ਚ ਵੀ ਕੰਮ ਕਰ ਚੁੱਕੇ ਹਨ ਅਤੇ IPL ਦੇ ਪਹਿਲੇ ਸੀਜ਼ਨ (2008) ‘ਚ ਖਿਡਾਰੀ ਵਜੋਂ ਵੀ ਇਸੇ ਫਰੈਂਚਾਈਜ਼ੀ ਨਾਲ ਜੁੜੇ ਸਨ। ਉਹ ਇਸ ਵੇਲੇ ਬ੍ਰਿਸਬੇਨ ਹੀਟ (BBL) ਦੇ ਮੁੱਖ ਕੋਚ ਹਨ ਅਤੇ ਜੂਨ 2026 ‘ਚ ਉਨ੍ਹਾਂ ਨੇ ਕੁਈਨਜ਼ਲੈਂਡ ਨਾਲ ਤਿੰਨ ਸਾਲ ਦਾ ਕਰਾਰ ਕੀਤਾ ਸੀ। ਦੂਜੇ ਪਾਸੇ ਬ੍ਰੈਡ ਹੈਡਿਨ ਟੀਮ ਦੇ ਬੱਲੇਬਾਜ਼ੀ ਤੇ ਵਿਕਟਕੀਪਿੰਗ ਕੋਚ ਸਨ। ਆਸਟ੍ਰੇਲੀਆ ਦੇ ਸਾਬਕਾ ਵਿਕਟਕੀਪਰ ਹੈਡਿਨ ਪਹਿਲਾਂ ਸਨਰਾਈਜ਼ਰਜ਼ ਹੈਦਰਾਬਾਦ ਨਾਲ ਵੀ ਕੰਮ ਕਰ ਚੁੱਕੇ ਹਨ।
ਪੌਂਟਿੰਗ ਨੂੰ ਬਣਾਉਣੀ ਪਵੇਗੀ ਨਵੀਂ ਟੀਮ
ਦੋਵਾਂ ਕੋਚਾਂ ਦੇ ਜਾਣ ਨਾਲ ਫਰੈਂਚਾਈਜ਼ੀ ਨੂੰ ਆਪਣੇ ਸਹਿਯੋਗੀ ਸਟਾਫ਼ ਦੇ ਕੁਝ ਹਿੱਸਿਆਂ ਨੂੰ ਮੁੜ ਬਣਾਉਣਾ ਪਵੇਗਾ। ਰਿਪੋਰਟਾਂ ਮੁਤਾਬਕ ਨਿਲਾਮੀ ਤੋਂ ਪਹਿਲਾਂ ਬਦਲਵੇਂ ਕੋਚਾਂ ਦੀ ਚੋਣ ‘ਚ ਮੁੱਖ ਕੋਚ ਰਿੱਕੀ ਪੌਂਟਿੰਗ ਦੀ ਅਹਿਮ ਭੂਮਿਕਾ ਰਹੇਗੀ। ਟੀਮ ਦੇ ਕਪਤਾਨ ਸ਼੍ਰੇਅਸ ਅਈਅਰ ਹਨ। ਹੁਣ ਦੇਖਣਾ ਹੋਵੇਗਾ ਕਿ ਪੌਂਟਿੰਗ ਕਿਨ੍ਹਾਂ ਨੂੰ ਆਪਣੀ ਟੀਮ ‘ਚ ਸ਼ਾਮਲ ਕਰਦੇ ਹਨ।
IPL 2026 ‘ਚ ਪੰਜਾਬ ਦਾ ਪ੍ਰਦਰਸ਼ਨ
IPL 2026 ‘ਚ ਪੰਜਾਬ ਕਿੰਗਜ਼ 14 ਮੈਚਾਂ ‘ਚੋਂ 15 ਅੰਕਾਂ ਨਾਲ ਪੰਜਵੇਂ ਸਥਾਨ ‘ਤੇ ਰਹੀ ਸੀ — 7 ਜਿੱਤਾਂ, 6 ਹਾਰਾਂ ਤੇ 1 ਬੇਨਤੀਜਾ ਮੈਚ। ਟੀਮ ਨੇ ਸੀਜ਼ਨ ਦੀ ਸ਼ੁਰੂਆਤ ਸ਼ਾਨਦਾਰ ਕੀਤੀ ਸੀ; ਗੁਜਰਾਤ ਟਾਈਟਨਜ਼, ਚੇਨਈ ਸੁਪਰ ਕਿੰਗਜ਼, ਮੁੰਬਈ ਇੰਡੀਅਨਜ਼ ਤੇ ਲਖਨਊ ਸੁਪਰ ਜਾਇੰਟਸ ਨੂੰ ਹਰਾਇਆ, ਪਰ ਮਈ ‘ਚ ਲਗਾਤਾਰ ਹਾਰਾਂ ਨੇ ਪਲੇਆਫ਼ ਦੀਆਂ ਉਮੀਦਾਂ ਤੋੜ ਦਿੱਤੀਆਂ। ਆਖ਼ਰੀ ਲੀਗ ਮੈਚ ‘ਚ ਲਖਨਊ ਨੂੰ 7 ਵਿਕਟਾਂ ਨਾਲ ਹਰਾ ਕੇ ਟੀਮ ਨੇ ਸੀਜ਼ਨ ਦਾ ਅੰਤ ਜਿੱਤ ਨਾਲ ਕੀਤਾ ਸੀ।
